Tbilisidə Zəfər Gününə həsr olunan təntənəli tədbir keçirilib (FOTO-VIDEO)

Paytaxt Tbilisidə Azərbaycanın Zəfər Gününün 5-ci ildönümü münasibətilə təntənəli tədbir keçirilib. 24News.ge xəbər verir ki, Azərbaycanın Gürcüstandakı səfirliyinin təşkilatçılığı və Diasporla İş üzrə Dövlət Komitəsinin dəstəyi ilə baş tutan tədbir Şota Rustaveli adına Dövlət Teatrında keçirilib. Tədbirdə Azərbaycan və Gürcüstan parlamentlərinin deputatları, Qazaxıstanın və Türkmənistanın səfirləri, Türkiyə səfirliyinin əməkdaşları, hər iki ölkənin dövlət və hökumət rəsmiləri, SOCAR-ın Gürcüstan nümayəndəliyinin, AZEBİ-nin rəhbərliyi və üzvləri, icma üzvləri və ictimaiyyət nümayəndələri iştirak ediblər. Tədbirdə əvvəlcə “Zəfərə aparan yol” sənədli filmi nümayiş etdirilib, sonra şəhidlərin xatirəsi bir dəqiqəlik sükutla yad olunub. Azərbaycanın Gürcüstandakı səfiri Faiq Quliyev çıxış edərək 44 günlük Vətən müharibəsi və qazanılmış böyük qələbə barədə ətraflı məlumat verib. O, həmçinin qeyd edib ki, bu gün keçirilən tədbir iki ölkə xalqları arasında dostluq və həmrəyliyin bariz nümunəsidir: "Bu Zəfər Azərbaycanın suverenliyi və müstəqilliyi uğrunda canlarını fəda etmiş qəhrəmanların şərəfidir. Onların adları xalqın yaddaşına, tarixin qızıl səhifələrinə əbədi həkk olunub. Azərbaycan xalqının sarsılmaz birliyi bu Zəfərin əsas dayağı olub. Əldə edilən böyük qələbə Azərbaycan xalqının Ali Baş Komandan İlham Əliyevə olan inamının və etimadının təntənəsidir. Xalqımız həmin o tarixi günlərdə öz liderinin ətrafında sıx birləşdi, ona inandı və bu inam bizə tarixi Zəfəri qazandırdı", - deyə səfir qeyd edib. Daha sonra çıxış edən Diasporla İş üzrə Dövlət Komitəsinin sədr müavini Vaqif Seyidbəyov müharibə dövründə xalqımızın və dünya azərbaycanlılarının birliyindən danışıb, şanlı Zəfərimizin xalqımızın əzmini və tarixi ədalətin təntənəsini təcəssüm etdirdiyini bildirib. Sədr müavini çıxışında Dövlət Komitəsinin layihələri və dəstəyi ilə dünyanın müxtəlif ölkələrində həyata keçirilən irimiqyaslı tədbirlər barədə məlumat verib. Tədbirin davamında çıxış edən Milli Məclisin deputatı, Gürcüstan Parlamentlərarası əlaqələr üzrə işçi qrupun rəhbəri Arzu Nağıyev Gürcüstan və Azərbaycanın birgə siyasəti və siyasi-iqtisadi uğurları haqqında danışıb. O, həmçinin Gürcüstanın işğal altında olan ərazilərinin tezliklə azad olunacağına və bu kimi zəfər tədbirlərinin birgə keçiriləcəyinə inandığını qeyd edib. Sonra tədbir konsert proqramı ilə davam edib. Müğənni Zamiq Hüseynov vətənpərvərlik mövzusunda mahnılarla, Gürcüstanın Dövlət Rəqs Akademiyasının “Erisioni” dövlət ansamblı rəqs nömrələri ilə çıxış edib.

www.24news.ge

Tbilisidə Zəfər Gününə həsr olunan təntənəli tədbir keçirilib (FOTO-VIDEO)

Digər xəbərlər