İran və ABŞ arasında Pakistanda keçirilən danışıqlar nəticəsiz başa çatıb

İran və ABŞ nümayəndə heyətləri arasında Pakistan vasitəçilərinin iştirakı ilə İslamabadda keçirilən danışıqlar 21 saat sonra başa çatıb. 24News.ge xəbər verir ki, bu barədə İranın dövlət teleradio şirkəti məlumat yayıb. Qeyd olunub ki, ABŞ‑ın həddindən artıq tələbləri və iddiaları səbəbindən tərəflər hər hansı bir razılaşmaya nail ola bilməyiblər. İran ABŞ-ın Hörmüz boğazı və nüvə energetikası ilə bağlı şərtlərini qəbul etməyib. İran tərəfindən qeyd olunub ki, Amerikalılar danışıqlar zamanı müharibə ilə əldə edə bilmədikləri hər şeyi tələb ediblər. Mənbə hesab edir ki, ABŞ tərəfi danışıqlar masasını tərk etmək üçün bəhanə axtarıb. "Tasnim" agentliyi də danışıqların nəticəsiz qalmasını Vaşinqtonun "həddindən artıq tələbləri" ilə əlaqələndirib. ABŞ-ın vitse-prezidenti Cey. Di. Vens danışıqların razılaşma ilə nəticələnmədiyini bildirib. O deyib ki, ABŞ "qırmızı xətlər"ini çox aydın şəkildə qeyd edib, lakin İran bu şərtləri qəbul etməyib. Vitse-prezident ABŞ-ın İrana son və ən yaxşı təklifini verdiyi bildirib: "Görək, iranlılar bunu qəbul edəcəklərmi?" İran Xarici İşlər Nazirliyinin nümayəndəsi İsmayıl Bəqai isə deyib: "İran və ABŞ bəzi məsələlərdə anlaşma əldə ediblər, lakin iki-üç mühüm mövzuda fikirlər ayrılıb. Bir sıra məsələlər üzrə qarşılıqlı anlaşma əldə olunub, lakin 2-3 vacib məsələ üzrə fikirlər ayrılıb və nəticədə danışıqlar razılaşmaya gətirib çıxarmayıb. Bu danışıqlarda Hörmüz boğazı mövzusu kimi bəzi yeni mövzular da əlavə olunub və onların hər birinin öz mürəkkəbliyi var". Bəqainin sözlərinə görə, danışıqlar etimadsızlıq və şübhə ab-havasında keçib: "Təbii ki, əvvəldən bir sessiyada razılaşma əldə olunacağını gözləmək olmazdı. Heç kim belə bir şey gözləmirdi. Danışıqların bu raundu bu il ərzində ən uzun olub və ümumilikdə 24 və ya 25 saat davam edib", - deyə o vurğulayıb. Pakistan Xarici İşlər Nazirliyinin bəyanatında deyilir: "İslamabad ABŞ və İran arasındakı dialoqda vasitəçilik rolunu yerinə yetirməyə davam edəcək və tərəflərin atəşkəs üzrə öhdəliklərini yerinə yetirməyə davam edəcəklərinə ümidvardır".

www.24news.ge

İran və ABŞ arasında Pakistanda keçirilən danışıqlar nəticəsiz başa çatıb

Digər xəbərlər