Rustavidə vətəndaşa yarımçıq binada mənzil satıblar – İki nəfərə ittiham irəli sürülüb

Prokurorluq Rustavidə vətəndaşı aldadaraq ona tamamlanmış bina əvəzinə yarımçıq tikilidə yerləşən mənzil satan iki nəfərə qarşı ittiham irəli sürüb. 24News.ge xəbər verir ki, qurumun məlumatına görə, təqsirləndirilən şəxslər bu yolla zərərçəkmişə məxsus 102 850 larini dələduzluq yolu ilə ələ keçiriblər. İstintaqla müəyyən edilib ki, şübhəlilər zərərçəkmişə guya istifadəyə verilmiş və tam tikilmiş yaşayış binasında yerləşən mənzili satdıqlarını bildiriblər. Daha inandırıcı görünmək üçün ona başqa bir mənzilin şəkillərini göndərərək həmin mənzilin satıldığını iddia ediblər. Lakin sonradan məlum olub ki, vətəndaşa faktiki olaraq tamamlanmamış yaşayış binasında yerləşən mənzil satılıb. Nəticədə təqsirləndirilən şəxslər zərərçəkmişin 102 850 lari məbləğində vəsaitini dələduzluq yolu ilə mənimsəyiblər. Prokurorluq hər iki şəxsə Cinayət Məcəlləsinin dələduzluqla bağlı maddələri üzrə – qabaqcadan əlbir olan bir qrup şəxs tərəfindən külli miqdarda törədilmiş dələduzluq ittihamı irəli sürüb. Bu cinayətə görə 9 ilədək azadlıqdan məhrumetmə cəzası nəzərdə tutulur. Məlumatda qeyd olunur ki, prokurorluq təqsirləndirilən şəxslər barəsində həbs-qətimkan tədbirinin seçilməsi üçün qanunla müəyyən olunmuş müddətdə məhkəməyə müraciət edəcək.

www.24news.ge

Rustavidə vətəndaşa yarımçıq binada mənzil satıblar – İki nəfərə ittiham irəli sürülüb

Digər xəbərlər