Baş nazirin iştirakı ilə Marneulidə Novruz şənliyi keçirilib (FOTO)

Bu gün, 21 mart tarixində Marneulidə Novruz Bayramı münasibətilə bayram tədbiri keçirilib. 24News.ge xəbər verir ki, şənlikdə yerli sakinlərlə yanaşı dövlət və hökumət nümayəndələri də iştirak ediblər. Tədbirə qatılan ölkənin baş naziri İrakli Qaribaşvili, nazirlər, yerli hökumət nümayəndələri, Azərbaycanın və Türkiyənin Gürcüstandakı səfirləri ilk öncə stentlərdə nümayiş olunan bayram atributlarını ziyarət ediblər daha sonra isə bayram tonqalını alovlandırıblar. Jurnalistlərə müsahibəsində baş nazir İrakli Qaribaşvili ölkənin azərbaycanlı icmasını Novruz bayramı münasibətilə təbrik edib. O, Novruzu qeyd edən vətəndaşlara cansağlığı, sülh və tərəqqi arzulayıb: “Hər kəsi bu gün münasibətilə təbrik etmək, vətəndaşlarımıza əmin-amanlıq, firavanlıq, daha çox bərəkət, daha çox sevinc, sabitlik və xalqımıza ən xoş arzularımı çatdırmaq istəyirəm. Azərbaycanlı həmvətənlərimizə, çox zəhmətkeş insanlara, çox ziyalı insanlara böyük hörmət və məhəbbətimi təsdiq etmək istəyirəm. Onların Novruz bayramını təbrik edirəm. Hər yerdə bu bayramı qeyd edənləri, Azərbaycandakı, Türkiyədəki qardaşlarımızı da təbrik edirəm”, - deyə baş nazir bildirib. Qeyd edək ki, baş nazir İrakli Qaribaşvili Marneuliyə səfəri çərçivəsində ağsaqqallarla da görüşüb.

www.24news.ge

Baş nazirin iştirakı ilə Marneulidə Novruz şənliyi keçirilib (FOTO)

Digər xəbərlər