ABŞ səfirliyi DTX-nın ittihamlarına cavab verib

"Layihələrimizdən birinə qarşı səslənən ittihamlar yalandır və bütün bunlar Gürcüstana yardımımızın məqsədlərini kökündən təhrif edir". 24News.ge xəbər verir ki, bu barədə Amerika Birləşmiş Ştatlarının ölkəmizdəki səfirliyindən Gürcüstan Dövlət Təhlükəsizlik Xidmətinin yaydığı bəyanata cavab olaraq bildirilib. Qeyd edilir ki, haqsız ittihamlara baxmayaraq Gürcüstanın Qeyri Hökumət Təşkilatlarına dəstək davam etdiriləcək: “Layihələrimizdən birinə qarşı ittihamlar yalandır və Gürcüstana yardımımızın məqsədlərini kökündən təhrif edir. USAID 1992-ci ildən etibarən Gürcüstan əhalisinə dəstək verir. Həmişə olduğu kimi, bu dəstək şəffafdır və biz hökumətin hər hansı narahatlığını müzakirə etmək üçün istənilən fürsəti alqışlayırıq. Vətəndaşların öz fikirlərini və istəklərini sərbəst ifadə etmək hüququ istənilən demokratiyanın təməlidir və bu bizim hər iki ölkənin paylaşdığı dəyərdir. İki ildən artıqdır ki, USAID insanlara ailələri və icmaları üçün vacib olan məsələlərdə səslərini ucaltmağa kömək etmək üçün CANVAS ilə əməkdaşlıq edir. CANVAS ilə əməkdaşlıq çərçivəsində uşaqların onkoloji xəstəliklərinin müalicəsinin təkmilləşdirilməsini tələb edən analar və ahılların hüquqlarını müdafiə edən şəxslər üçün treninqlər keçirilib. Əsassız hücumlara baxmayaraq, biz insanlara onların müəyyən etdiyi və layiq olduğu gələcəyi, Gürcüstan Konstitusiyası ilə təminat verilən fundamental hüquqları qorumağa kömək edən gürcü təşkilatlarını dəstəkləməyə davam edəcəyik”, - deyə ABŞ səfirliyinin bəyanatında bildirilir. Məlumat üçün bildirək ki, Gürcüstan Dövlət Təhlükəsizlik Xidməti sentyabrın 25-də üç nəfər Serbiya vətəndaşlarının USAID tərəfindən həyata keçirilən proqramın, Şərq-Qərb İdarəetmə İnstitutunun dəvəti ilə Gürcüstana gəldiklərini, adıçəkilən şəxslərin 2003-cü ildə Gürcüstanda baş vermiş inqilabi hadisələrlə əlaqəli olduqlarını və müxtəlif illərdə Serbiya, Ukrayna və digər dövlətlərdə də analoji proseslərdə adlarının hallandığı barədə bəyanat yayıb.

www.24news.ge

ABŞ səfirliyi DTX-nın ittihamlarına cavab verib

Digər xəbərlər