Azərbaycanda Dini icma üzvünə qarşı terror aktı planlaşdıran Gürcüstan vətəndaşı saxlanılıb

Azərbaycan Dövlət Təhlükəsizliyi Xidməti (DTX) tərəfindən keçirilmiş əməliyyat-axtarış tədbirləri nəticəsində Azərbaycanda fəaliyyət göstərən dini icmalardan birinin üzvünə qarşı terror aktı planlaşdırmış Gürcüstan vətəndaşı A. Aslanov və Azərbaycan vətəndaşı C. İsmayılov saxlanılıblar. 24News.ge xəbər verir ki, bu barədə Azərbaycan Dövlət Təhlükəsizliyi Xidməti məlumat yayıb. Məlumatda bildirilir ki, narkotik vasitələrin qaçaqmalçılığı ilə məşğul olan A. Aslanov 2024-cü ilin sentyabr ayında üçüncü ölkədə səfərdə olarkən tanışı vasitəsilə həmin ölkənin xüsusi xidmət orqanının əməkdaşları ilə görüşüb və həmin şəxslər Azərbaycanda olan dini icma üzvünün fotoşəkillərini Aslanova göstərib barəsində məlumat verərək 200 min ABŞ dolları müqabilində ona sui-qəsd edilməsini təklif ediblər. Qarşılıqlı razılıq əsasında Aslanova ilkin olaraq icma üzvü və onun iş yeri barədə zəruri kəşfiyyat məlumatlarının toplanılaraq onlara ötürülməsi tapşırılıb, bunun üçün isə 2 min ABŞ dolları məbləğində avans təqdim edilib. Tapşırığın icrası ilə bağlı Bakı şəhərinə gələn A. Aslanov maddi maraq müqabilində cinayət əməllərində iştiraka cəlb etdiyi C. İsmayılovla birgə dini icma üzvü barədə məlumatların toplanılması istiqamətində işlər görüblər, onun yaşayış və iş yerinin məkan göstəricilərini müvafiq mobil telefon tətbiqi vasitəsilə xarici xüsusi xidmət orqanı nümayəndəsinə göndəriblər. Faktla əlaqədar DTX-də Cinayət Məcəlləsinin 28, 214.2.1, 274, 276 və digər maddələri ilə istintaqı aparılan cinayət işi üzrə məhkəmə tərəfindən A. Aslanov və C. İsmayılov barəsində həbs qətimkan tədbiri seçilib.

www.24news.ge

Azərbaycanda Dini icma üzvünə qarşı terror aktı planlaşdıran Gürcüstan vətəndaşı saxlanılıb

Digər xəbərlər