Marneulidə klinikada amansızca döyülən Ələddin Qərənzadə vəfat edib

Marneuli şəhərində yerləşən “Geo Hospitals” klinikasında baş vermiş insident nəticəsində ağır xəsarət alan Bolnisi bələdiyyəsinin Saraçlı (Mamxuti) kənd sakini, 63 yaşlı Qərənzadə Ələddin vəfat edib. 24News.ge xəbər portalına yaxınlarının verdiyi məlumata əsasən, hadisə aprelin 11-də klinikada baş verib. Bildirilir ki, Ələddin Qərənzadə insidentdən sonra ağır vəziyyətdə Tbilisidə yerləşən tibb müəssisəsinə köçürülmüş və həmin vaxtdan süni tənəffüs aparatına qoşulmuş vəziyyətdə müalicə alırdı. Yaxınlarının sözlərinə görə, hadisə xəstə ziyarəti ilə bağlı yaranan mübahisə zamanı baş verib. Bildirilir ki, klinikanın qəbul saatları başa çatdıqdan sonra mühafizəçi xəstə yaxınlarının binaya daxil olmasına icazə verməyib. Bundan sonra tərəflər arasında mübahisə yaranıb və nəticədə zərərçəkənə qarşı fiziki zorakılıq tətbiq edilib. Məlumata əsasən, Qərənzadə Ələddin Levan Xaptani tərəfindən döyülüb və aldığı ağır bədən xəsarətləri səbəbindən xəstəxanaya yerləşdirilib. Hadisə ilə bağlı 24News.ge-nin sorğusunu cavablandıran Daxili İşlər Nazirliyi bildirib ki, fakt üzrə bir nəfər saxlanılıb. Hadisə ilə əlaqədar Cinayət Məcəlləsinin qəsdən sağlamlığa ağır zərər vurmanı nəzərdə tutan 117-ci maddəsi ilə istintaq aparılır.

www.24news.ge

Marneulidə klinikada amansızca döyülən Ələddin Qərənzadə vəfat edib

Digər xəbərlər