Gürcüstan, Türkiyə və Azərbaycan xüsusi əməliyyat qüvvələrinin üçtərəfli təlimi başlayıb (VİDEO)

Tbilisi yaxınlığındakı Muxrovani hərbi bazasında Azərbaycan, Türkiyə və Gürcüstan xüsusi təyinatlılarının iştirakı ilə "Qafqaz Qartalı - 2026" birgə taktiki-xüsusi təliminin açılış mərasimi keçirilib. 24News.ge xəbər verir ki, bu barədə Gürcüstanın Müdafiə Nazirliyi məlumat yayıb. Sahə taktiki təlimlərinin rəsmi açılış mərasimi Muxrovani qəsəbəsində yerləşən mayor Gela Çedia adına Xüsusi Təyinatlı Təlim Mərkəzində keçirilib. Tədbirdə Gürcüstanın müdafiə nazirinin birinci müavini Paata Patiyaşvili, Azərbaycanın Gürcüstandakı səfiri Faiq Quliyev və Türkiyənin Gürcüstandakı səfiri Mustafa Türker Arı iştirak ediblər. Təlim iştirakçıları qarşısında çıxış edən Gürcüstan Müdafiə Qüvvələri komandanının müavini, general-mayor İrakli Çiçinadze, Türkiyə və Azərbaycanın hərbi attaşeliklərinin nümayəndələri, eləcə də Xüsusi Əməliyyatlar Qüvvələrinin komandanı polkovnik Teimuraz Klateişvili təlimin uğurla keçirilməsini arzulayıblar. Məlumata görə, təlimin əsas məqsədi Gürcüstan, Azərbaycan və Türkiyənin xüsusi əməliyyat bölmələri arasında koordinasiyanın gücləndirilməsi, qarşılıqlı fəaliyyət qabiliyyətinin artırılması və təcrübə mübadiləsinin genişləndirilməsidir. Təlimlər əsasən kiçik hərbi bölmələrin taktiki hazırlığı və müxtəlif tapşırıqların icrası üzərində qurulub. Təlim prosesini hər üç ölkənin nümayəndələrindən ibarət qiymətləndirici qrup izləyəcək. Qeyd edək ki, “Qafqaz Qartalı” üçtərəfli xüsusi əməliyyatlar təlimi hər il rotasiya prinsipi əsasında Gürcüstan, Azərbaycan və Türkiyədə keçirilir.

www.24news.ge

Gürcüstan, Türkiyə və Azərbaycan xüsusi əməliyyat qüvvələrinin üçtərəfli təlimi başlayıb (VİDEO)

Digər xəbərlər