Xüsusi əməliyyat keçirilib: Kriminal avtoritet Elmuraz Məmmədovla əlaqədə olan şəxslər saxlanılıb (VİDEO)

Daxili İşlər Nazirliyinin Mərkəzi Kriminal Polis Departamentinin əməkdaşları Baş Prokurorluqla birgə həyata keçirdikləri əməliyyat tədbirləri nəticəsində son 24 saat ərzində Tbilisi, Şida Kartli və Kvemo Kartli bölgələrində “qanuni oğru” aləmi ilə əlaqədə şübhəli bilinən 21 nəfəri saxlayıblar. 24News.ge xəbər verir ki, departamentin direktoru David Kiknadze keçirdiyi brifinqdə bildirib ki, məhkəmə qərarı əsasında daha 9 nəfərə ittiham irəli sürülüb. Onlardan bəziləri penitensiar müəssisələrdə cəza çəkən şəxslər, digərləri isə qiyabi qaydada, o cümlədən xaricdə yaşayan kriminal avtoritetlərdir. İstintaqın məlumatına görə, təqsirləndirilən şəxslər maliyyə mübahisələrinin həlli üçün “oğru söhbətləri” təşkil edib və bu proseslərdə xaricdə yaşayan kriminal avtoritet Elmuraz Mamedov iştirak edib. Araşdırma zamanı müəyyən olunub ki, Elmuraz Məmmədov Gürcüstandakı əlaqəli şəxslərlə mütəmadi əlaqə saxlayaraq vətəndaşlardan müəyyən müddətlər ərzində bizneslərindən böyük məbləğdə pul ödəmələrini tələb edib. Bildirilir ki, bu tələblər həm şəxsi mənfəət, həm də kriminal avtoritetin maraqları naminə “oğru qaydaları” əsasında irəli sürülüb. İstintaq materiallarına əsasən, müəyyən edilmiş müddətlərə əməl edilmədikdə zərərçəkənlər fiziki zorakılıq və ya ölümlə hədələniblər. Keçirilən axtarışlar zamanı şübhəlilərin mobil telefonları və kompüter avadanlıqları maddi sübut kimi götürülüb. Hüquq-mühafizə orqanları hesab edir ki, həmin vasitələrdən şübhəlilərin bir-biri və xaricdə yaşayan kriminal avtoritetlə əlaqə saxlaması üçün istifadə olunub. Saxlanılan şəxslərin yaşayış yerlərində aparılan axtarışlar zamanı, həmçinin “oğru kassası” üçün toplandığı ehtimal edilən 62 min ABŞ dollarından artıq vəsait, müxtəlif avtomobillər, döyüş sursatları və odlu silahlar aşkarlanaraq götürülüb. Faktla bağlı Cinayət Məcəlləsinin müvafiq maddələri üzrə istintaq aparılır. Təqsiri sübuta yetirilən şəxsləri 15 ilədək azadlıqdan məhrumetmə cəzası gözləyir. Daxili İşlər Nazirliyi bəyan edib ki, mütəşəkkil cinayətkarlığa və “qanuni oğru” aləminə qarşı mübarizə istiqamətində əməliyyat-axtarış və istintaq tədbirləri davam etdiriləcək.

www.24news.ge

Xüsusi əməliyyat keçirilib: Kriminal avtoritet Elmuraz Məmmədovla əlaqədə olan şəxslər saxlanılıb (VİDEO)

Digər xəbərlər