Qardabanidə fermerdən 200 min dollar tələb edən kriminal avtoritetin adamları saxlanıldı (VİDEO)

Kvemo Kartli Polis Departamentinin Qardabani Rayon Şöbəsinin əməkdaşları qəsdən adam öldürməyə cəhd və odlu silahın qanunsuz əldə edilməsi, saxlanılması və daşınması ittihamı ilə iki nəfəri saxlayıblar. 24News.ge xəbər verir ki, bu barədə məlumatı Daxili İşlər Nazirliyi yayıb. Nazirliyin məlumatına görə, hazırda İnterpol tərəfindən axtarışa verilən kriminal avtoritet Elmuraz Məmmədov “qanuni oğrular aləmi”nin adından Qardabanidə yaşayan fermerdən 200 min ABŞ dolları tələb edib. O, fermerə pulu ödəmək üçün üç günlük müddət müəyyənləşdirib və əks halda ailə üzvlərinə qarşı fiziki zorakılıq və həyatlarına qəsd etməklə hədələyib. Müddət bitdikdən sonra isə fermerin ailəsinə məxsus avtomobildə hərəkət edən oğlu naməlum şəxslər tərəfindən odlu silahla atəşə tutulub. Hadisə nəticəsində xəsarət alan olmayıb. Polisin məlumatına əsasən, cinayəti törədən şəxslərin kimliyi müəyyən edilib. 1994-cü il təvəllüdlü T.X və əvvəllər məhkum olunmuş, 2001-ci il təvəllüdlü N.İ saxlanılıb. Həmin cinayətlə əlaqəli daha bir şəxs – 1985-ci il təvəllüdlü Ş.M barəsində isə axtarış elan olunub. İstintaq Cinayət Məcəlləsinin 19-108-ci (qəsdən adam öldürməyə cəhd) və 236-cı (qanunsuz silah dövriyyəsi) maddələri ilə aparılır. Nazirliyin məlumatına görə, sözügedən cinayət 15 ilədək azadlıqdan məhrumetmə cəzası nəzərdə tutur.

www.24news.ge

Qardabanidə fermerdən 200 min dollar tələb edən kriminal avtoritetin adamları saxlanıldı (VİDEO)

Digər xəbərlər