Tbilisi Cümə məscidində izdihamlı Aşura mərasimi keçirilib (FOTO)

Paytaxt Tbilisidə yerləşən tarixi Cümə məscidində Məhərrəm ayının onuncu günü – Aşura günü münasibətilə anım mərasimi keçirilib. 24News.ge xəbər verir ki, mərasimdə Tbilisi sakinləri ilə yanaşı, ölkənin müxtəlif bölgələrindən gələn yüzlərlə inanclı iştirak edib. Ziyarətçilərin çoxluğu səbəbindən məscidin daxilində və ətrafında böyük izdiham yaşanıb. Mərasimdə çıxış edən din xadimləri İslam tarixinin ən faciəli hadisələrindən biri olan Kərbəla hadisəsi, Həzrət Məhəmməd Peyğəmbərin (s) əziz nəvəsi İmam Hüseynin (ə) və onun silahdaşlarının şəhadəti barədə ətraflı məlumat veriblər. Çıxışlarda Aşura gününün yalnız matəm günü deyil, eyni zamanda ədalətə sədaqətin, zülmə qarşı mübarizənin və mənəvi ucalığın rəmzi olduğu vurğulanıb. Anım mərasimi zamanı Kərbəla şəhidlərinin xatirəsinə həsr olunmuş mərsiyələr və nohələr səsləndirilib. Məscidə toplaşan inanclılar birgə sinə vuraraq matəm saxlayıb, mərasimin sonunda dualar oxunub və ehsan süfrəsi təşkil edilib. Qeyd edək ki, Tbilisi Cümə məscidində Məhərrəm ayı münasibətilə 10 gün ərzində dini mərasimlər təşkil olunub. Mərasimlərdə müxtəlif din xadimləri və ilahiyyatçılar iştirak edərək Kərbəla hadisəsinin dini və mənəvi mahiyyəti barədə moizələr söyləyiblər.

www.24news.ge

Tbilisi Cümə məscidində izdihamlı Aşura mərasimi keçirilib (FOTO)

Digər xəbərlər