Baş nazir: “Ötən il aqroərzaq məhsullarının ixracı 1 milyard 845 milyon dollara çatıb”

Baş nazir İrakli Kobaxidze Fermerlər Gününə həsr olunmuş tədbirdə çıxış edib. 24News.ge xəbər verir ki, Baş nazir bildirib ki, Gürcüstanda ölkənin iqtisadi inkişafı, ərzaq təhlükəsizliyi, sosial sabitlik, eləcə də kənd təsərrüfatının güclənməsi fermerlərin əməyindən asılıdır. Kobaxidzenin sözlərinə görə, kənd təsərrüfatı sahəsində mühüm irəliləyiş əldə olunub. O qeyd edib ki, ötən il aqrobiznesin ümumi istehsal həcmi təxminən 20 milyard lariyə çatıb ki, bu da 2012-ci illə müqayisədə 2,5 dəfə çoxdur. Baş nazir kənd təsərrüfatında yaradılan ÜDM-in 5,4 milyard lariyə yüksəldiyini və hazırda ölkə iqtisadiyyatının təxminən 6%-ni təşkil etdiyini bildirib. Onun sözlərinə görə, kənd yerlərində məşğul olan insanların sayı 577 mini keçib, işsizlik səviyyəsi isə 11,2%-ə qədər azalıb. İrakli Kobaxidze bildirib ki, Gürcüstanın aqroərzaq məhsulları beynəlxalq bazarlarda mövqeyini gücləndirir: “Ötən il aqroərzaq məhsullarının ixracı 110-dan çox ölkəyə həyata keçirilib və tarixi rekord – 1 milyard 845 milyon dollar təşkil edib. Bu il də artım dinamikası davam edir. 7 aylıq göstəricilərə əsasən, ixrac ötən ilin eyni dövrü ilə müqayisədə artıq 14% çoxdur. Ümumilikdə, bu sektor hazırda Gürcüstanın ümumi ixracının təxminən dörddə birini – 24%-ni təşkil edir”, – deyə baş nazir bildirib. Kobaxidzenin sözlərinə görə, fermerlərin dəstəklənməsi və kənd təsərrüfatının inkişafı məqsədilə bir sıra dövlət proqramları həyata keçirilir. O qeyd edib ki, bu il yerli istehsalın artırılması, idxalın əvəzlənməsi və ixrac potensialının gücləndirilməsi məqsədilə vahid “Aqromaliyyələşdirmə Dövlət Proqramı” və fermerlər reyestri fəaliyyətə başlayıb. Baş nazir həmçinin kənd təsərrüfatına gənclərin və qadın fermerlərin marağının artdığını vurğulayıb: “Gənclər kənd təsərrüfatına yeni biliklər, müasir texnologiyalar və Gürcüstan kənd təsərrüfatının davamlı inkişafı üçün lazım olan yeni enerji gətirirlər”, – deyə Kobaxidze bildirib. Baş nazir çıxışının sonunda bütün fermerləri təbrik edib və onlara uğurlar arzulayıb.

www.24news.ge

Baş nazir: “Ötən il aqroərzaq məhsullarının ixracı 1 milyard 845 milyon dollara çatıb”

Digər xəbərlər