Baş nazir müxalifət partiyalarının qadağan edilməsi təşəbbüsünün uğurla nəticələnəcəyini açıqladı

Baş nazir İrakli Kobaxidze ümid etdiyini bildirib ki, hakim “Gürcü Arzusu” partiyasının müxalifət partiyalarının qadağan edilməsi ilə bağlı Konstitusiya Məhkəməsinə təqdim etdiyi iddia uğurla nəticələnəcək. 24News.ge xəbər verir ki, Kobaxidzenin sözlərinə görə, məhkəmə prosesi hakimiyyətin, yoxsa radikal müxalifətin qeyri-legitim olduğunu müəyyənləşdirməyə xidmət edir. Baş nazir bildirib ki, hakim komandanın iddiası ölkədə siyasi qütbləşmənin yaratdığı “qapalı dairəni” qırmağa yönəlib. Kobaxidzenin sözlərinə görə, vaxtilə Gürcüstana təqdim edilən tələblər arasında depolarizasiya məsələsi də yer alıb, lakin onun fikrincə, bu tələb formal xarakter daşıyıb. O, Avropa Parlamentinin nümayəndələri - Rasa Yukneviçieneni və onun tərəfdarlarını Gürcüstanda qütbləşmənin davam etməsində maraqlı olmaqda ittiham edib. Baş nazir qeyd edib ki, kollektiv “Milli Hərəkat” adlandırdığı siyasi qüvvələr hakimiyyətin legitimliyini şübhə altına almaqda davam edirlər. Onun sözlərinə görə, konstitusiya quruluşunu qeyri-legitim elan edən və onu devirməyə çalışan şəxslərə qarşı hüquqi tədbirlər görülməlidir. Kobaxidze həmçinin Ukrayna və Moldovada siyasi partiyaların qadağan edilməsini misal gətirərək, Gürcüstana münasibətdə ikili standartların tətbiq olunduğunu bildirib. O, həmin ölkələrdə siyasi partiyaların qadağan edilməsinin demokratiya prinsipləri ilə əlaqələndirilmədiyini, Gürcüstanla bağlı isə fərqli yanaşma nümayiş etdirildiyini bildirib. Baş nazir seçkilərlə bağlı beynəlxalq qiymətləndirmələrdə də ikili standartların olduğunu deyərək, ölkədə hüququn aliliyinin qorunmasının vacibliyini vurğulayıb. Partiyaların qadağan edilməsi ilə bağlı iddianın müzakirəsinə beynəlxalq reaksiyalara münasibət bildirən Kobaxidze isə bunu məhkəmə hakimiyyətinin müstəqilliyinə siyasi müdaxilə cəhdi kimi qiymətləndirib. O, beynəlxalq tərəfdaşları məhkəmə prosesinə müdaxilə etməməyə çağırıb və bildirib ki, hüquqi qiymətləndirmələr yalnız iddia və məhkəmə qərarı ilə tanış olduqdan sonra verilməlidir.

www.24news.ge

Baş nazir müxalifət partiyalarının qadağan edilməsi təşəbbüsünün uğurla nəticələnəcəyini açıqladı

Digər xəbərlər