Məhərrəm ayının gəlişi ilə bağlı Gürcüstan Müsəlmanları İdarəsinin Şeyxi ilə müsahibə

Gürcüstan Müsəlmanları İdarəsinin (BGMİ) şeyxi Hacı Faiq Nəbiyev Hicri-qəməri təqvimi ilə iyunun 16-da Məhərrəm ayının başlanması ilə bağlı müsahibə verib. 24News.ge xəbər portalının suallarını cavablandıran şeyx, bir sıra mötəbər mənbələrdən stat gətirərək, Məhərrəm ayında Hz Peyğəmbərin əziz nəvəsinin şəhadəti ilə bağlı tövsiyyələri diqqətə çatdırıb. Jurnalist: Hacı, Sizi xoş gördük. Məhərrəm ayının gəlişi ilə bağlı dünya miqyasında olduğu kimi, Gürcüstanda da bir çox məscidlərdə əzadarlıq məclisləri, anım tədbirləri keçiriləcək. Ümumiyyətlə, bu mərasimlərin mahiyyəti nədir və İmam Hüseynə (ə) yas saxlamaq bizə nə qazandırır? Hacı Faiq Nəbiyev: Xoş gördük, sizə və oxucularımıza rəhmət və bərəkət dolu günlər arzulayıram. Məhərrəm ayı və İmam Hüseynin (ə) xatirəsini əziz tutmaq sadəcə tarixi bir hadisəni yad etmək deyil; bu mərasimlər bəşəriyyətə fədakarlıq, izzət və haqsevərlik dərsi keçən bir vəhdət (birlik) məktəbidir. Tez-tez vurğuladığımız bir həqiqət var: Əhlibeytə (ə) məhəbbət təkcə bir məzhəbə məxsus deyil, bu sevgi bütün müsəlmanları birləşdirən ortaq dəyərdir. Əhli-sünnə qardaşlarımızın da qəlbi Peyğəmbər (s) soyuna qarşı böyük sevgi ilə döyünür. Baxın, məşhur əhli-sünnə mənbələrindən olan "Sünən-i Tirmizi"də (5/656, hədis 3769) Üsəmə ibn Zeyd nəql edir ki, Həzrət Peyğəmbər (s) buyurub: "Həsən və Hüseyn mənim oğullarım və qızımın oğullarıdır. İlahi, mən onları sevirəm, Sən də onları sev və onları sevənləri də sev!" İmam Hüseynin (ə) müsibətinə göz yaşı tökməyin mənəvi mükafatı isə çox böyükdür. Böyük İslam alimi Əhməd ibn Hənbəlin "Fəzailus-səhabə" əsərində (2/840, hədis 1154) Hüseyn ibn Əlinin (ə) belə buyurduğu nəql olunur: "Kimin gözləri bizə görə yaşarsa və ya bir damla göz yaşı axıtsa – Uca Allah onu Cənnətdə məskunlaşdırar". Deməli, bu məclislər bizi həm rəhbərimiz Həzrət Məhəmməd Mustafanın (s) duasına şərik edir, həm də cənnət müjdəsi ilə qəlblərimizi birləşdirir. Jurnalist: Vəhdət və birlik mövzusuna toxundunuz. Bəs bu günlərdə cəmiyyətdə həmin birliyi və barışı qorumaq, ixtilaflardan uzaq olmaq üçün din xadimləri və möminlər nələrə diqqət etməlidir? Hacı Faiq Nəbiyev: Çox mühüm bir məqamdır. Vəhdəti pozmamaq üçün bu müqəddəs günlərdə kürsülərdən, minbərlərdən ancaq və ancaq müsəlmanları birləşdirən, vəhdətə zidd olmayan rəvan və hikmətli moizələr edilməlidir. İxtilaf yarada biləcək xırda məsələləri kənara qoyub, diqqəti Kərbəlanın əsl mahiyyətinə yönəltməliyik. Biz insanlara Kərbəladan danışmalıyıq; İmam Hüseynin (ə) uca fəzilətlərini, onun Kərbəlaya getməsinin əsl fəlsəfəsini – yəni haqqı dirçəltmək, zülmə boyun əyməmək və İslam əxlaqını qorumaq amallarını çatdırmalıyıq. Kərbəla şəhidlərinin göstərdiyi misilsiz vəfa və fədakarlıq məqamlarını, o müqəddəs hadisədən çıxarmalı olduğumuz dərsləri insanlara anlatmalıyıq. Əgər biz Kərbəlanın bu ali, bəşəri tərəfini önə çıxarsaq, bu, cəmiyyətimizdə sarsılmaz bir birlik və qardaşlıq bağları yaradacaq. Jurnalist: Bu müqəddəs aylarda məscidlərdə gecə-gündüz çalışanlar olur. Ehsan verənlər, mərasimlərin təşkilinə gələnlər, vaizlər və xadimlər haqqında nə demək istərdiniz? Hacı Faiq Nəbiyev: Bu insanlar Allah tərəfindən çox böyük mənəvi məqamlar və lütf əta edilən şəxslərdir. Peyğəmbər (s) ailəsinin qapısında xidmətçi olmaq, gələnlərə bir stəkan çay uzatmaq, məscidi təmizləmək və ya haqqı danışmaq hər kəsə nəsib olmayan bir şərəfdir. Lakin bir şərtimiz var: biz gərək bu işləri tam bir ixlas və təqva (günahdan çəkinmək) ilə edək. İnsanlara gözəl xidmət göstərmək və onlara din haqqında düzgün, xurafatdan uzaq məlumatlar çatdırmaq hamımızın, xüsusən də din xadimlərinin borcudur. Bu fədakarlıqların cəmiyyətə əxlaqi təsiri olduqca böyükdür. İmam Hüseyn (ə) məclislərində xidmət edən gənclərimiz fədakarlığı, təmənnasız kömək etməyi, bir-birinə hörmət bəsləməyi öyrənirlər. Bu işlər insan qəlbinə elə bir əxlaqi nur verir ki, bəzən illərlə oxunan kitabların edə bilmədiyi müsbət mənəvi təsiri, bir Məhərrəm ayı insan xarakterində formalaşdırır. İnsanlar burada mərhəməti, səbiri və paylaşmağı öyrənirlər. Jurnalist: Bəzi insanlar bu məclislərə getməkdə tərəddüd edirlər. İnsanlara niyə məhz bu matəm məclislərinə, xüsusən də axşam tədbirlərinə qatılmağı tövsiyə edirsiniz? Hacı Faiq Nəbiyev: Biz qardaş və bacılarımıza bu günlərdə, xüsusilə də axşam saatlarında keçirilən məclislərə ailəliklə, övladları ilə birlikdə getmələrini israrla tövsiyə edirik. Bunun çox dərin mənəvi səbəbləri var. Əhlibeyt İmamları (ə) bu cür zikr və elm məclislərini, İmam Hüseynin (ə) yad edildiyi yerləri birbaşa “cənnət bağları”na oxşadırlar. Bu mərasimlərə təmiz niyyətlə və ixlasla gələrək İmam Hüseynin (ə) matəmində iştirak etmək, hər bir müsəlman üçün dünya və axirət səadətinə qovuşmağın mənəvi açarı ola bilər. Çünki bu məclislər rəhmətin yerə endiyi, qəlblərin yumşaldığı anlardır və belə bərəkətli məqamlarda edilən dualar mütləq qəbul olar. Əlbəttə ki, bunlardan ən vacib və ali məqam odur ki, biz bu məclislərdə iştirak etməklə İslam Peyğəmbərinin (s) bu hüznlü günündə onun yanında olduğumuzu, onunla birlikdə kədərləndiyimizi nümayiş etdiririk. Bu, Peyğəmbərə (s) olan beyətimizin və vəfamızın göstəricisidir. Eyni zamanda, bu məclislər ruhumuzun qidasıdır; insan bura gələrək daxili dünyasını şərlərin, günahların toz-torpağından təmizləyir. Jurnalist: Hacı, dəyərli fikirləriniz üçün təşəkkür edirik. Son olaraq müsəlman ümmətinə və cəmiyyətimizə nə demək istərdiniz, hansı çağırışı edərdiniz? Hacı Faiq Nəbiyev: Son olaraq, bütün əziz qardaş və bacılarıma səslənirəm: gəlin bu müqəddəs ayı bir fürsət bilək. Bu ayda küsülüləri barışdırmağı, qohumluq əlaqələrini bərpa etməyi, valideynlərimizin və böyüklərimizin xeyir-duasını alıb onları razı salmağı özümüzə hədəf seçək. Çünki bu mübarək ayda, xüsusən İmam Hüseyn (ə) xatirinə edilən bu cür xeyirxah əməllərin Allah qatında dəyəri və savabı qat-qat böyükdür. Fürsətdən istifadə edərək, Gürcüstan müsəlmanlarına göstərdiyi yüksək diqqət, qayğı və tolerant mühitə görə çoxşaxəli Gürcüstan Dövlətinə öz dərin təşəkkürümü bildirirəm. Bu günlərdə məscidlərimizin ətrafında, kütləvi tədbirlərdə asayişi, əmin-amanlığı və təhlükəsizliyi ən yüksək səviyyədə təmin edən dəyərli hüquq-mühafizə orqanlarının əməkdaşlarına, polislərimizə xüsusi minnətdarlığımı çatdırıram. Və son olaraq, Gürcüstan Din İşləri üzrə Dövlət Agentliyinə və şəxsən onun hörmətli rəhbəri cənab Zaza Vaşakmadzeyə sonsuz təşəkkürümü bildirirəm. Agentliyin müsəlmanların dini günlərini rəsmi təqvimə salması, bu müqəddəs günlərdə müsəlman icmasına xüsusi müraciətlər ünvanlayıb təbrik və başsağlığı verməsi, dini haqlarımızın qorunmasında göstərdiyi sistemli dəstək bizim üçün çox qiymətlidir. Mütəal Allahdan arzum budur ki, bu Məhərrəm ayını ölkəmiz, xalqımız və bütün bəşəriyyət üçün sülh, vəhdət və xeyir-bərəkət ayı qərar versin. Hamınızdan dualar gözləyirəm.

www.24news.ge

Məhərrəm ayının gəlişi ilə bağlı Gürcüstan Müsəlmanları İdarəsinin Şeyxi ilə müsahibə

Digər xəbərlər