“Gürcüstan Dəmir Yolları” sərnişinlərə gecikməyə görə kompensasiya ödəyəcək

“Gürcüstan Dəmir Yolları”nın sərnişinləri qatarın gecikməsi halında kompensasiya almaq hüququ əldə edə bilərlər. 24News.ge xəbər verir ki, İqtisadiyyat və Davamlı İnkişaf nazirinin təsdiq etdiyi “Dəmir yolu sərnişinlərinin hüquqlarının müdafiəsi qaydaları”nda dəmir yolu müəssisəsinin səbəb olduğu gecikmələrə görə sərnişinlərə kompensasiya ödənilməsi nəzərdə tutulur. Qaydalara əsasən, sərnişin təyinat məntəqəsinə 60 dəqiqə və ya daha çox gecikmə ilə çatdığı halda kompensasiya tələb edə bilər. Minimum kompensasiya məbləği belə müəyyənləşdirilib: 60–120 dəqiqə gecikmə – bilet qiymətinin 25%-i; 120 dəqiqə və ya daha çox gecikmə – bilet qiymətinin 50%-i. Kompensasiya sərnişinin ödədiyi biletin ümumi məbləği əsasında hesablanacaq və əlavə komissiya haqqı nəzərə alınmayacaq. Sərnişin kompensasiya tələbini gecikmiş və ya ləğv edilmiş reysin başlanma tarixindən sonrakı 10 gün ərzində təqdim etməlidir. Kompensasiya isə müraciətdən sonra 30 gün ərzində ödənilməlidir. Sərnişinin razılığı ilə kompensasiya vauçer və ya dəmir yolu ilə digər uyğun xidmət formasında da təqdim edilə bilər. Lakin sərnişin tələb etdiyi halda kompensasiya pul şəklində ödənilməlidir. Dəmir yolu şirkətləri kompensasiyanın ödənilməsi üçün minimum məbləğ müəyyən edə bilər. Bu hədd bir bilet üçün 5 laridən çox ola bilməz. Qaydalara əsasən, sərnişin gecikmə barədə bilet almamışdan əvvəl məlumatlandırılıbsa, kompensasiya almaq hüququna malik olmayacaq. Həmçinin əlverişsiz hava şəraiti, təbii fəlakət, epidemiya və digər fövqəladə hallar, sərnişinin öz təqsiri və ya üçüncü şəxslərin hərəkətləri səbəbindən yaranan gecikmələrə görə dəmir yolu müəssisəsinin kompensasiya ödəmək öhdəliyi olmayacaq. Üçüncü şəxslərin hərəkətlərinə, məsələn, şəxsin dəmir yoluna çıxması, elektrik naqillərinin oğurlanması, qatarda fövqəladə vəziyyət, hüquq-mühafizə orqanlarının tədbirləri, sabotaj və terror aktları daxildir. Bununla belə, dəmir yolu müəssisəsinin əməkdaşlarının tətili, eyni dəmir yolu infrastrukturundan istifadə edən digər dəmir yolu şirkətinin fəaliyyəti və ya hərəkətsizliyi, eləcə də infrastruktur və stansiya menecerinin hərəkəti və ya hərəkətsizliyi bu istisnalara aid edilmir. 60 dəqiqədən çox gecikmə gözlənilirsə, sərnişinə seçim hüququ veriləcək. Qaydalara görə, sərnişinin təyinat məntəqəsinə 60 dəqiqə və ya daha çox gecikmə ilə çatacağı əsaslı şəkildə gözlənilirsə, dəmir yolu şirkəti sərnişinə dərhal bir neçə seçim təqdim etməlidir. Sərnişin: səfərin həyata keçirilməyən hissəsi üçün bilet pulunun geri qaytarılmasını və ilkin səfər planı mümkün olmadıqda artıq qət etdiyi hissənin də ödənişinin qarşılanmasını, ilk mümkün vaxtda oxşar nəqliyyat şəraiti ilə səfəri davam etdirməyi və ya marşrutu dəyişməyi, özünə uyğun vaxtda səfəri davam etdirməyi və ya marşrutu dəyişməyi seçə bilər. Əgər dəmir yolu ilə səfərin davam etdirilməsi ağlabatan müddətdə mümkün deyilsə, sərnişinə alternativ quru nəqliyyatı xidməti təklif edilməlidir. Qeyd edək ki, sənəddə baqajın itirilməsi, zədələnməsi və gecikmə ilə çatdırılması hallarında kompensasiya şərtləri də müəyyənləşdirilib.

www.24news.ge

“Gürcüstan Dəmir Yolları” sərnişinlərə gecikməyə görə kompensasiya ödəyəcək

Digər xəbərlər