Dələduzluq faktları ilə bağlı 5 Gürcüstan və 1 Türkiyə vətəndaşı saxlanılıb (VİDEO)

Dövlət Təhlükəsizlik Xidmətinin Korrupsiyaya Qarşı Mübarizə Agentliyinin əməkdaşları iki ayrı cinayət işi üzrə keçirilən istintaq və əməliyyat tədbirləri nəticəsində iri məbləğdə dələduzluq və dələduzluğa cəhd faktları ilə bağlı 5 Gürcüstan və 1 Türkiyə vətəndaşını saxlayıb. 24News.ge xəbər verir ki, bu barədə DTX-nin Korrupsiyaya Qarşı Mübarizə Agentliyinin direktoru Emzar Qaqnidze keçirdiyi brifinqdə məlumat verib. Onun sözlərinə görə, cinayət işlərindən biri üzrə aparılan araşdırma nəticəsində müəyyən edilib ki, Türkiyə vətəndaşı Gürcüstanın 4 vətəndaşı ilə birlikdə dələduzluq məqsədilə yaradılmış qrupun üzvü olub. O, Gürcüstanda müvəqqəti yaşayan Türkiyə vətəndaşına 14 500 ABŞ dolları müqabilində yaşayış icazəsi almağa kömək edəcəyini vəd edib, lakin vədini yerinə yetirməyib. Məlumata görə, zərərçəkmiş şəxsin ölkədə qanuni qalma müddəti başa çatıbmış. Bundan xəbərdar olan qrupun digər üzvləri daha sonra həmin şəxslə əlaqə saxlayaraq 3 000 ABŞ dolları müqabilində onun Gürcüstanda qalması üçün qanuni əsas yaratmağı təklif ediblər. İstintaqın məlumatına görə, həmin şəxsin şəxsiyyət vəsiqəsindən istifadə edilərək sərhədi faktiki keçmədiyi halda, xüsusi sənəddə Gürcüstan dövlət sərhədinin hər iki istiqamətdə keçildiyini təsdiqləyən rəsmi möhürlər yerləşdirilib. İkinci cinayət işi üzrə isə araşdırma zamanı müəyyən edilib ki, Gürcüstanda müvəqqəti yaşayan Türkmənistan vətəndaşının ölkədə qanuni qalma müddəti başa çatıb. Gürcüstan vətəndaşı ona 4 000 ABŞ dolları qarşılığında sərhəddən çıxarılacağını və daha sonra ölkəyə geri qaytarılacağını, bununla da Gürcüstanda qalma müddətinin qanuni şəkildə uzadılacağını vəd edib. Lakin şübhəli şəxs vədini yerinə yetirməyib, buna baxmayaraq vəsaitin bir hissəsini tələb edərək alıb. Faktlarla bağlı araşdırma Cinayət Məcəlləsinin müvafiq maddələri ilə aparılır. Bu maddələr 9 ilədək azadlıqdan məhrumetmə cəzasını nəzərdə tutur. DTX-nin Korrupsiyaya Qarşı Mübarizə Agentliyi sözügedən cinayət sxeminə cəlb olunan digər şəxslərin müəyyənləşdirilməsi və onların cinayət məsuliyyətinə cəlb edilməsi istiqamətində araşdırmaları davam etdirir.

www.24news.ge

Dələduzluq faktları ilə bağlı 5 Gürcüstan və 1 Türkiyə vətəndaşı saxlanılıb (VİDEO)

Digər xəbərlər