Peşə təhsil proqramlarına qeydiyyat başlayıb

Gürcüstanda peşə təhsil proqramlarına qeydiyyat başlayıb. Qeydiyyat peşə təhsili portalı – vet.ge üzərindən aparılır və 9 oktyabr tarixinədək davam edəcək. 24News.ge xəbər verir ki, bu barədə Təhsil İdarəetmə İnformasiya Sistemi məlumat yayıb. Məlumata görə, 2026-cı ilin payız qəbulu çərçivəsində 568 peşə təhsil proqramı üzrə qəbul elan olunub. Onlardan 37-si tam ümumi təhsilin orta pilləsinin təlim nəticələrini özündə birləşdirən orta peşə təhsil proqramlarıdır. Məlumata görə, 80 peşə təhsili müəssisəsində qəbul üçün ümumilikdə 21 372 yer ayrılıb. Qeydiyyat zamanı namizəd ən çox 3 peşə təhsil proqramı seçə və qeydiyyat müddəti başa çatana qədər seçimini dəyişə bilər. Həm əsas, həm də tam ümumi təhsil haqqında sənədi olan şəxslərin peşə təhsili proqramlarında təhsil almaq hüququ var. Bununla yanaşı, namizəd seçdiyi proqram üzrə müəyyən edilmiş qəbul tələblərinə cavab verməlidir. Dövlət tərəfindən yaradılmış peşə təhsili müəssisələrində təhsil tamamilə dövlət hesabına maliyyələşdirilir. Özəl hüquqi şəxs statusunda fəaliyyət göstərən müəssisələrdə isə təhsil haqqı vauçer maliyyələşdirməsi vasitəsilə, Təhsil, Elm və Gənclər Nazirliyi tərəfindən müəyyən edilən prioritetlərə uyğun qarşılanır. Namizədlərin seçimi 12 oktyabrdan 8 noyabr tarixinədək müvafiq peşə təhsili proqramı və təhsil müəssisəsi tərəfindən müəyyən edilmiş qaydalara əsasən həyata keçiriləcək. Ali peşə təhsil proqramlarına qəbul isə Qiymətləndirmə və İmtahanlar üzrə Milli Mərkəzin təşkil etdiyi testlərin nəticələrinə əsasən aparılacaq. Testlər 24 oktyabrda təbiət elmləri, 25 oktyabrda isə savadlılıq və kəmiyyət savadlılığı üzrə keçiriləcək. Seçim prosesi başa çatdıqdan sonra Təhsil İdarəetmə İnformasiya Sistemi namizədlərin qiymətləndirmə nəticələrini, sosial cəhətdən həssas ailələrin vahid məlumat bazasında müavinət alan şəxs statusunu və əldə edilmiş təhsil səviyyəsini nəzərə alaraq reytinq siyahısı hazırlayacaq. Əgər namizəd qeydiyyat zamanı bir neçə proqram seçibsə, nəticələr elan edildikdən sonra 11–13 noyabr tarixlərində sistemdə yekun seçimini təsdiqləməli və qəbul hüququ qazandığı proqramlardan birini seçməlidir. Peşə təhsil proqramları, müəssisələr, qəbul şərtləri və qeydiyyatla bağlı ətraflı məlumat vet.ge portalında yerləşdirilib.

www.24news.ge

Peşə təhsil proqramlarına qeydiyyat başlayıb

Digər xəbərlər