Fermerlər qiymət tələbi ilə yolu bağlayıblar

Kaxetidə üzümçülərin etiraz aksiyasının miqyası genişlənib. Kvareli bələdiyyəsinin Axalsopeli kəndindən sonra Veliçixedə də aksiya keçirilir. 24News.ge xəbər verir ki, üzümçülər bir qədər əvvəl mərkəzi avtomobil yolunu bağlayıblar. Əraziyə bir neçə patrul ekipajı cəlb olunub, yolun həmin hissəsində nəqliyyatın hərəkəti məhdudlaşdırılıb. Fermerlər üzümün adekvat və qəbulolunan qiymətə alınmasını tələb edirlər. Onların sözlərinə görə, üzüm bağlarının saxlanılması, aqrokimyəvi preparatların alınması, işçi qüvvəsinin cəlb edilməsi və məhsulun daşınmasına çəkilən xərclər üzümün satış qiymətindən xeyli yüksəkdir. Etirazçılar şəkərlilik səviyyəsi aşağı olan üzüm üçün kiloqramına 30 tetri ödənilməsini qəbuledilməz hesab edirlər. Aksiya iştirakçılarından biri deyib: “Kaxetə diqqət yetirməlidirlər, biz uyğun qiymət tələb edirik. Hökumət üçün mümkün olmayan heç nə istəmirik”. Başqa bir fermer isə üzümün qəbul edilməsi üçün şərait yaradılmasını tələb edib və hökumətin açıqlamalarını tənqid edib. Bundan əvvəl də fermerlər üzüm qəbul edən müəssisələrin qarşısında etiraz ediblər. Bəzi fermerlər gecəni üzümlə yüklənmiş avtomobillərdə keçiriblər. Etirazçıların əsas tələbi məhsullarının ədalətli qiymətlə qəbul edilməsidir. Etiraz aksiyası əvvəlcə Kvareli bələdiyyəsinin Şilda kəndində başlayıb, daha sonra Axalsopelidə davam edib. Üzümçülər bildirirlər ki, əvvəlcədən ölçdükləri üzümün şəkərlilik göstəricisi zavodlarda müəyyən edilən göstərici ilə uyğun gəlmir. Onların sözlərinə görə, bu səbəbdən məhsulu daha aşağı qiymətə təhvil vermələri təklif olunur. Qüvvədə olan dövlət sxeminə əsasən, şəkərliliyi 17 faizə qədər olan üzümün alış qiyməti kiloqram üçün 30 tetri müəyyən edilib. Fermerlərin bir hissəsi hesab edir ki, bu məbləğ üzümün yetişdirilməsi və yığılması üçün çəkilən xərcləri belə qarşılamır və mövcud tənzimləmənin dəyişdirilməsini tələb edir.

www.24news.ge

Fermerlər qiymət tələbi ilə yolu bağlayıblar

Digər xəbərlər