პრემიერმა რუსეთთან ურთიერთობების საკითხებში სპეციალური წარმომადგენელი დანიშნა

პრემიერ-მინისტრმა ირაკლი კობახიძემ გიორგი ზურაბაშვილი რუსეთთან ურთიერთობის საკითხებში პრემიერ-მინისტრის სპეციალურ წარმომადგენლად დანიშნა. 24News.ge-ის ინფორმაციით, ამის შესახებ ირაკლი კობახიძემ რამდენიმე წუთის წინ მთავრობის ადმინისტრაციაში გამართულ ბრიფინგზე განაცხადა. პრემიერ-მინისტრის თქმით, რუსეთის ფედერაციასთან კონფლიქტის მშვიდობიანი გზით მოგვარება, არსებული სავაჭრო-ეკონომიკური ურთიერთობების შენარჩუნება და განვითარება, ასევე ჰუმანიტარულ საკითხებთან დაკავშირებით უწყვეტი დიალოგის წარმოება საქართველოს მთავარ პრიორიტეტებს წარმოადგენს. კობახიძის განცხადებით, საქართველოსა და რუსეთს შორის დიპლომატიური ურთიერთობების არარსებობის პირობებში, ჟენევის ფორმატთან ერთად, პრემიერ-მინისტრის სპეციალური წარმომადგენლის თანამდებობაც მნიშვნელოვან როლს ასრულებს ამ მიზნების განხორციელებაში. პრემიერ-მინისტრმა აღნიშნა, რომ გიორგი ზურაბაშვილი დიდი გამოცდილების მქონე დიპლომატია. იგი საქართველოს საგარეო საქმეთა სამინისტროში სხვადასხვა დეპარტამენტის დირექტორის, ასევე საგანგებო და სრულუფლებიანი ელჩის თანამდებობებზე მუშაობდა. ზურაბაშვილი 2024 წელს საქართველოს საგარეო საქმეთა მინისტრის მოადგილედ, 2025 წლის 1 ივლისს კი მინისტრის პირველ მოადგილედ დაინიშნა. „დარწმუნებული ვარ, რომ გიორგი ზურაბაშვილი თავისი ცოდნისა და გამოცდილების წყალობით პრემიერ-მინისტრის სპეციალური წარმომადგენლის რანგში დაკისრებულ მოვალეობებს საუკეთესოდ შეასრულებს“, – განაცხადა ირაკლი კობახიძემ.

www.24news.ge

პრემიერმა რუსეთთან ურთიერთობების საკითხებში სპეციალური წარმომადგენელი დანიშნა

სხვა სიახლეები