ოფიციალური განცხადება: „დეკემბერში გაზისა და წყლის ტარიფები ხელახლა გადაიხედება“

საქართველოში მიმდინარე წლის ბოლოს ბუნებრივი აირისა და წყალმომარაგების ტარიფების გადახედვა იგეგმება. ელექტროენერგიის ტარიფის ცვლილება კი წლის ბოლომდე გათვალისწინებული არ არის. 24News.ge-ის ინფორმაციით, ამის შესახებ საქართველოს ენერგეტიკისა და წყალმომარაგების მარეგულირებელი ეროვნული კომისიის თავმჯდომარემ, დავით ნარმანიამ, ინტერვიუში განაცხადა. მისი თქმით, ელექტროენერგიის ახალი ტარიფები რამდენიმე თვის წინ განისაზღვრა და საშუალოვადიან პერიოდში ძალაში დარჩება. ბუნებრივი აირისა და წყალმომარაგების ტარიფების მოქმედების ვადა კი დეკემბრის ბოლოს იწურება, რის გამოც აღნიშნული ტარიფების გადახედვა იგეგმება. „მიმდინარე წლის ბოლოს ელექტროენერგიის ტარიფების გადახედვის საჭიროება არ არსებობს. ახალი ტარიფები რამდენიმე თვის წინ განვსაზღვრეთ და ისინი საშუალოვადიან პერიოდში ძალაში დარჩება. მიმდინარე წლის ბოლოს კი ბუნებრივი აირისა და წყალმომარაგების ტარიფების გადახედვას ვგეგმავთ, რადგან მათი მოქმედების ვადა სწორედ დეკემბრის ბოლოს იწურება“, – განაცხადა ნარმანიამ. აღსანიშნავია, რომ საქართველოში ელექტროენერგიის ტარიფი მიმდინარე წლის აპრილიდან საშუალოდ 5 თეთრით გაიზარდა. ამჟამად თბილისში მოსახლეობისთვის ბუნებრივი აირის ერთი კუბური მეტრის ტარიფი 53,971 თეთრს შეადგენს. აღნიშნული ტარიფი თავდაპირველად 2021 წლის მაისში განისაზღვრა და იმავე წლის 1 ივნისიდან ამოქმედდა. მოგვიანებით ტარიფის მოქმედების ვადა ცვლილების გარეშე გაგრძელდა 2023–2025 წლების, ხოლო შემდეგ 2026–2027 წლების მარეგულირებელი პერიოდებისთვის. რაც შეეხება წყალმომარაგებას, მრიცხველის მქონე აბონენტები მოხმარებული წყლის თითოეულ 1 კუბურ მეტრზე 0,50 ლარს იხდიან. მრიცხველის არმქონე აბონენტებისთვის კი ყოველთვიური გადასახადი საცხოვრებელ სახლში რეგისტრირებული თითოეული პირისთვის 4,517 ლარს შეადგენს. ახალი ტარიფების განსაზღვრასთან დაკავშირებით საბოლოო გადაწყვეტილების რა მიმართულებით იქნება მიღებული, ჯერჯერობით უცნობია.

www.24news.ge

ოფიციალური განცხადება: „დეკემბერში გაზისა და წყლის ტარიფები ხელახლა გადაიხედება“

სხვა სიახლეები