Noyabr ayından iki Gürcüstan süd müəssisəsi Rusiya bazarına daxil ola biləcək

2026-cı ilin noyabr ayından etibarən Gürcüstanın iki süd emalı müəssisəsi Rusiya bazarına məhsul ixrac edə biləcək. 24News.ge xəbər verir ki, bu barədə Rusiyanın Baytarlıq və Fitosanitar Nəzarət üzrə Federal Xidməti (“Rosselxoznadzor”) məlumat yayıb. Qurumun məlumatına görə, oktyabrın 20–22-də Tbilisidə keçirilən Ümumdünya Heyvan Sağlamlığı Təşkilatının (WOAH) regional seminarı çərçivəsində “Rosselxoznadzor” və Gürcüstanın Ətraf Mühitin Mühafizəsi və Kənd Təsərrüfatı Nazirliyinin Milli Qida Agentliyinin nümayəndələri arasında görüş keçirilib. Görüşdə əməkdaşlığın genişləndirilməsi, heyvandarlıq məhsulları üzrə qarşılıqlı ticarətin artırılması və hər iki ölkənin bazarına yeni məhsul növlərinin buraxılması məsələləri müzakirə olunub. “Rosselxoznadzor”un açıqlamasında bildirilir ki, Gürcüstanın müvafiq qurumundan daxil olan müraciət və təqdim edilmiş məlumatların təhlili əsasında Rusiya tərəfi Avrasiya İqtisadi İttifaqının səlahiyyətli orqanlarına iki süd emalı müəssisəsinin üçüncü ölkələrin müəssisələri reyestrinə daxil edilməsi ilə bağlı müraciət edib. Bundan əlavə, Rusiya tərəfi Gürcüstanda balıq və dəniz məhsulları istehsal edən, məhsullarını Rusiya bazarına çıxarmaq istəyən altı müəssisədə yoxlamalar aparmağa hazır olduğunu bildirib. Qurumun məlumatına görə, yoxlamalar vaxtında həyata keçirilərsə və hər hansı pozuntu aşkarlanmazsa, həmin müəssisələrin balıq məhsullarının Rusiya bazarına çıxarılmasına icazə verilə bilər.

www.24news.ge

Noyabr ayından iki Gürcüstan süd müəssisəsi Rusiya bazarına daxil ola biləcək

Digər xəbərlər