Zorakılıqda ittiham olunan 6 polis barəsində həbs qətimkan tədbiri seçilib

Qoridə Papuna Lotsulaşvili və Laşa Abisonaşvili barəsində zorakılıq etməkdə ittiham olunan 6 polis əməkdaşı — Aleksi Badalov, Giorgi Tskrialaşvili, Saba Tsavelidze, İvane Misireli, Vladimir Goderdzişvili və Beso Malatsidze haqqında həbs qətimkan tədbiri seçilib. 24News.ge xəbər verir ki, müvafiq qərarı Qori Rayon Məhkəməsinin hakimi Germane Dadeshkeliani qəbul edib. Prokurorluq təqsirləndirilən şəxslər barəsində həbs qətimkan tədbirinin seçilməsini tələb edib. Prokuror Nino Zurabaşvili bildirib ki, polis əməkdaşlarının gizlənməsi, sübutları məhv etməsi və şahidlərə təsir göstərməsi riski mövcuddur. Onun sözlərinə görə, təqsirləndirilən şəxslər xidməti vəzifələrinə uyğun olaraq ictimai asayişi qorumağa borclu idilər, lakin əksinə zorakılıq hərəkətləri törədiblər. Müdafiə tərəfi isə həbs tələbinə etiraz edib. Bəzi vəkillər təqsirləndirilən şəxslərin istintaqla əməkdaşlıq etdiyini, cinayəti etiraf etdiyini və qaçma riskinin olmadığını əsas gətirərək onların 5 min lari girov müqabilində azadlığa buraxılmasını istəyiblər. 19 yaşlı polis əməkdaşı Saba Tsavelidzenin vəkili onun gənc yaşını və reabilitasiya imkanlarını nəzərə almağa çağırıb, alternativ qətimkan tədbirləri — ev dustaqlığı, elektron qolbaq və polisə mütəmadi müraciət öhdəliyi təklif edib. Prokuror Mişa Beriaşvili isə iş üzrə çoxsaylı birbaşa sübutların, o cümlədən video görüntülərinin olduğunu bildirib. Onun sözlərinə görə, kadrlarda polis əməkdaşlarının zərərçəkmişlərə qarşı zorakılıq tətbiq etdiyi açıq şəkildə görünür. Hakim prokurorluğun vəsatətini təmin edib və 6 polis əməkdaşı barəsində həbs qətimkan tədbiri seçib. Hakim Germane Dadeşkeliani prokurorluğun altı polis məmurunun işdən çıxarılması ilə bağlı vəsatətini də təmin edib. İş üzrə ilkin məhkəmə iclası iyulun 24-də saat 12:00-da keçiriləcək. Qeyd edək ki, hadisə Qoridə, “Kombinat” adlanan yaşayış massivində baş verib. İddialara görə, hüquq-mühafizə orqanlarının əməkdaşları Papuna Lotsulaşvili və onun dostuna fiziki zorakılıq tətbiq ediblər. Faktla bağlı saxlanılan 6 polis əməkdaşına Cinayət Məcəlləsinin 333-cü maddəsinin 3-cü hissəsinin “b” bəndi ilə — zor tətbiq etməklə xidməti səlahiyyətləri aşma ittihamı irəli sürülüb. Bu maddə 5 ildən 8 ilədək azadlıqdan məhrumetmə cəzasını nəzərdə tutur. Bununla yanaşı, Papuna Lotsulaşviliyə qarşı da Cinayət Məcəlləsinin 353-cü maddəsi ilə — polis əməkdaşına qarşı zorakılıq ittihamı üzrə istintaq aparılır.

www.24news.ge

Zorakılıqda ittiham olunan 6 polis barəsində həbs qətimkan tədbiri seçilib

Digər xəbərlər