Bolnisinin Vanati kəndində Qurban Bayramı münasibətilə tədbir keçirilib (FOTO)

Bolnisi bələdiyyəsinin Vanati kəndində müqəddəs Qurban Bayramı münasibətilə tədbir təşkil olunub. Tədbirdə din xadimləri, ilahiyyatçılar, kənd ictimaiyyəti və çoxsaylı sakinlər iştirak ediblər. 24News.ge xəbər verir ki, tədbirdə çıxış edən Bütün Gürcüstan Müsəlmanları İdarəsinin Şeyxi Hacı Faiq Nəbiyev iştirakçıları Qurban Bayramı münasibətilə təbrik edib, bayramın İslam dinindəki mənəvi əhəmiyyətindən danışıb. O, Qurban Bayramının insanları mərhəmətə, yardımlaşmaya, birlik və həmrəyliyə səslədiyini vurğulayaraq bildirib ki, bu müqəddəs gün yalnız ibadət deyil, eyni zamanda qarşılıqlı hörmət, paylaşma və xeyirxahlığın təcəssümüdür. Tədbirdə Bolnisinin Baş Axundu Hacı İfrət Əhmədov, İmam Rza Təhsil Mərkəzinin rəhbəri Hacı Əziz Nəbiyev, digər din xadimləri və ilahiyyatçılar da iştirak ediblər. Görüş çərçivəsində dini-maarifçilik fəaliyyətinin genişləndirilməsi, gənc nəslin milli-mənəvi və islami dəyərlərə sadiq, vətənpərvər ruhda formalaşdırılması məsələləri müzakirə olunub. Çıxış edənlər gənclərə vətən sevgisinin, dövlətçilik ənənələrinin aşılanmasının, dini biliklərin düzgün şəkildə çatdırılmasının, eləcə də cəmiyyətdə mənəvi birliyin və həmrəyliyin gücləndirilməsinin vacibliyini diqqətə çatdırıblar. Tədbirin sonunda mühüm təyinat qərarı elan olunub. Bütün Gürcüstan Müsəlmanları İdarəsinin Şeyxi Hacı Faiq Nəbiyevin müvafiq qərarı ilə Nicat Musayev Vanati kəndinə din xadimi təyin edilib. Qeyd olunub ki, bu addım kənddə dini-mənəvi fəaliyyətin inkişafına, maarifləndirmə işinin gücləndirilməsinə və gənclərin sağlam mənəvi dəyərlər əsasında formalaşmasına töhfə verəcək. Sonda iştirakçılar Qurban Bayramının yaratdığı yüksək mənəvi ab-hava şəraitində birlik nümayiş etdirərək, bu cür görüşlərin cəmiyyətin mənəvi inkişafı baxımından mühüm əhəmiyyət daşıdığını bildiriblər.

www.24news.ge

Bolnisinin Vanati kəndində Qurban Bayramı münasibətilə tədbir keçirilib (FOTO)

Digər xəbərlər