Baş nazirin hesabatı: "Gürcüstanda 15 “qanuni oğru” və 335 nəfər cinayət məsuliyyətinə cəlb edilib"

Baş nazir İrakli Kobaxidzenin parlamentə təqdim olunan hesabatında qeyd olunur ki, Daxili İşlər Nazirliyinin 2025-ci il iyunun 1-dən 2026-cı ilin may ayınadək olan fəaliyyətinə dair hökumət hesabatında təşkilatlanmış cinayətkarlıqla mübarizə istiqamətində əldə olunan nəticələr açıqlanıb. 24News.ge xəbər verir ki, hesabata əsasən, qeyd olunan dövrdə 15 nəfər “qanuni oğru” cinayət məsuliyyətinə cəlb olunub. Bundan əlavə, “oğru dünyası” ilə əlaqəli digər cinayətlərdə iştirak etməkdə ifşa olunan 335 nəfər barəsində də hüquqi tədbirlər görülüb. Sənəddə bildirilir ki, narkotik cinayətləri ilə mübarizə sahəsində də genişmiqyaslı əməliyyatlar həyata keçirilib. Belə ki, hesabat dövründə narkotiklərlə bağlı cinayətlərə görə cinayət məsuliyyətinə cəlb olunan şəxslərin sayı 8 mini ötüb. Daxili İşlər Nazirliyi beynəlxalq hüquq-mühafizə orqanları ilə əməkdaşlığını da davam etdirib. Hesabat dövründə İnterpol və digər kommunikasiya kanalları vasitəsilə xarici tərəfdaşlarla 25 min nəfərlə bağlı 13 mindən çox operativ məlumat mübadiləsi aparılıb. Yol təhlükəsizliyi sahəsində görülən tədbirlər çərçivəsində ölkə üzrə videomüşahidə infrastrukturu genişləndirilib. Bu müddətdə 1318 videokamera quraşdırılıb. Onlardan 1170-i ümumi müşahidə kameraları, 148-i isə dövlət qeydiyyat nişanlarını avtomatik tanıyan “ağıllı” kameralardır. Bundan başqa, beynəlxalq və daxili əhəmiyyətli avtomobil yollarında orta sürətə nəzarət məqsədilə 40 yeni nəzarət sahəsi yaradılıb. Bu sistemlər ümumilikdə 159 kilometrlik yol hissəsini əhatə edir. Hesabatda qeyd olunur ki, miqrasiya axınlarının idarə olunması istiqamətində aparılan tədbirlər nəticəsində Gürcüstanda qanunsuz yaşayan 2 154 xarici vətəndaş ölkədən çıxarılıb. Eyni zamanda, 92 xüsusi immiqrasiya nəzarəti tədbiri həyata keçirilib və 9 mindən çox şəxs yoxlanılıb.

www.24news.ge

Baş nazirin hesabatı: "Gürcüstanda 15 “qanuni oğru” və 335 nəfər cinayət məsuliyyətinə cəlb edilib"

Digər xəbərlər