სემეკმა „მამედ გაზის“ ლიცენზიის გაუქმების პროცესი დაიწყო

საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ საჯარო სხდომაზე დაიწყო საჯარო ადმინისტრაციული წარმოება შპს “მამედის” ბუნებრივი გაზის განაწილების ლიცენზიის გაუქმების თაობაზე. შპს “მამედის” სალიცენზიო არეალია მარნეულის მუნიციპალიტეტის სოფელი ყიზილ-აჯლო. კომისია განმარტავს, რომ შპს “მამედის” ბუნებრივი გაზის განაწილების ლიცენზიის გაუქმება არ გამოიწვევს მოსახლეობისთვის ბუნებრივი გაზის მიწოდების შეფერხებას. მომხმარებლები ბუნებრივ გაზს მიიღებენ უწყვეტად. საჯარო ადმინისტრაციული წარმოების ფარგლებში კომისიის ინდივიდუალური ადმინისტრაციულ-სამართლებრივი აქტის შესახებ მოსაზრებების წარმოსადგენად ბოლო ვადად განისაზღვრა 2026 წლის 24 ივლისი, ხოლო სამართლებრივი აქტის გამოცემის ბოლო ვადად - 2026 წლის 24 სექტემბერი. გაზგამანაწილებელი კომპანიის “მამედის” ბუნებრივი გაზის განაწილების ლიცენზიის გაუქმების საფუძველია სალიცენზიო პირობების შეუსრულებლობა. შპს “მამედი” არ იხდიდა შესყიდული გაზის დაგროვილ დავალიანებას, რამაც გამოიწვია ბუნებრივი გაზის მიწოდების შეწყვეტა. ამასთანავე, შპს „მამედის“ სალიცენზიო არეალში (სოფელი ყიზილ-აჯლო) საყოფაცხოვრებო მომხმარებლებისთვის მარეგულირებელი კომისიის მიერ დადგენილია 47 თეთრიანი ტარიფი (დღგ-ის ჩათვლით). მიუხედავად ამისა, შპს „მამედი“ მომხმარებლებს თვითნებურად არიცხავდა კომისიის მიერ დადგენილზე მაღალ ტარიფს (57 თეთრი დღგ-ის ჩათვლით), რასთან დაკავშირებითაც მიმდინარეობს მოკვლევა შესაბამისი საგამოძიებო ორგანოების მიერ.

www.24news.ge

სემეკმა „მამედ გაზის“ ლიცენზიის გაუქმების პროცესი დაიწყო

სხვა სიახლეები