აზერბაიჯანისა და საქართველოს საბაჟო სამსახურები სატრანსპორტო საშუალებების შემოწმებას ერთობლივად განახორციელებენ

აზერბაიჯანსა და საქართველოს შორის ერთობლივი სასაზღვრო კონტროლის პუნქტის პროექტირების სამუშაოები მიმდინარეობს. 24News.ge-ის ინფორმაციით, ამის შესახებ აზერბაიჯანის სახელმწიფო საბაჟო კომიტეტის თავმჯდომარემ, საბაჟო სამსახურის გენერალ-პოლკოვნიკმა შაჰინ ბაღიროვმა განაცხადა. მისი თქმით, მთავრობის მხრიდან სახელმწიფო საბაჟო კომიტეტს ამ მიმართულებით შესაბამისი დავალებები აქვს მიცემული: „საქართველოს საზღვართან ახალი გამშვები პუნქტის მშენებლობის ფარგლებში მიმდინარე სამუშაოები ძირითადად ობიექტის განთავსებისთვის ტერიტორიის შერჩევას უკავშირდება და ამ ეტაპზე ეს პროცესი გრძელდება. მომდევნო ეტაპებზე სხვა ტექნიკური საკითხების გადაწყვეტაა დაგეგმილი. შექმნილი პუნქტი სრულად დააკმაყოფილებს თანამედროვე სტანდარტებს და აქ ერთობლივი კონტროლის მექანიზმი დაინერგება. სხვა სიტყვებით რომ ვთქვათ, აზერბაიჯანისა და საქართველოს საბაჟო სამსახურები ერთმანეთთან ახლო მანძილზე იმუშავებენ, რაც სატრანსპორტო საშუალებების სინქრონულად შემოწმების შესაძლებლობას შექმნის“, - განაცხადა მან. შაჰინ ბაღიროვმა აღნიშნა, რომ მსგავსი სისტემა, დროის დაზოგვასთან ერთად, გააუმჯობესებს კონტროლის პროცესის ხარისხს, შესაძლო რისკების უფრო სწრაფად გამოვლენას შეუწყობს ხელს და მომსახურების სიჩქარეს გაზრდის.

www.24news.ge

სხვა სიახლეები