Ağməmmədli kəndində içməli su problemi sakinləri çətin vəziyyətdə qoyub

Marneuli bələdiyyəsinin Ağməmmədli kəndində içməli su problemi sakinlərin gündəlik həyatını çətinləşdirir. Kənd sakinlərinin 24News.ge xəbər portalına verdikləri məlumata görə, əvvəllər içməli su qrafikə uyğun olaraq həftədə iki dəfə verilsə də, son iki həftədir həmin qrafikə də əməl olunmur və kəndə ümumiyyətlə su verilmir. Sakinlərin sözlərinə görə, su təchizatının dayandırılması onları alternativ yollar axtarmağa məcbur edib. Onlar içməli suyu qonşu kəndlərdən pul qarşılığında almaq məcburiyyətində qaldıqlarını bildiriblər. Qeyd olunub ki, bir su çəninin qiyməti təxminən 60 lari təşkil edir. Bu isə xüsusilə aztəminatlı ailələr üçün əlavə maliyyə yükü yaradır. Sakinlər problemin qısa zamanda həll olunmasını və kəndin fasiləsiz içməli su ilə təmin edilməsini aidiyyəti qurumlardan xahiş edirlər. Məsələ ilə bağlı aidiyyəti qurumun mövqeyini öyrənməyə çalışdıq. Qurumdan cavab alındıqdan sonra məlumat ictimaiyyətə təqdim olunacaq.

www.24news.ge

Ağməmmədli kəndində içməli su problemi sakinləri çətin vəziyyətdə qoyub

Digər xəbərlər