ფერმერების მოთხოვნა გათვალისწინებულია — საქართველოში იმპორტირებულ ხორბალზე საბაჟო გადასახადი დაწესდება

საქართველოს მთავრობამ, ფერმერთა მოთხოვნების გათვალისწინებით, ქვეყანაში ხორბლის იმპორტზე საბაჟო გადასახადის – „სარკისებრი გადასახადის“ შემოღების შესახებ გადაწყვეტილება მიიღო. 24News.ge იუწყება, რომ „საქართველოს ხორბლისა და ფქვილის მწარმოებთა ასოციაციის“ აღმასრულებელი დირექტორის, ლევან სილაგავას ინფორმაციით, ახალი გადასახადი 1 კილოგრამ ხორბალზე 10 თეთრს, ხოლო ერთ ტონაზე 100 ლარს შეადგენს. სილაგავას თქმით, გადაწყვეტილების მიღების ერთ-ერთი მთავარი მიზეზი ადგილობრივი ფერმერების მიმართვა იყო. მან აღნიშნა, რომ ფერმერებს ხორბლის გაყიდვა უჭირთ, რადგან არსებული ფასი დაბალია. ამის ერთ-ერთი მთავარი მიზეზი კი რუსეთში ხორბლის დაბალი ფასია. მისი თქმით, საქართველოში ადგილობრივი მოთხოვნის სრულად დასაკმაყოფილებლად საკმარისი ხორბალი არ იწარმოება და ქვეყანაში დამატებითი იმპორტი უნდა განხორციელდეს. ამიტომ მნიშვნელოვანია, თუ რა პერიოდის განმავლობაში იმოქმედებს ახალი გადასახადი. სილაგავას განცხადებით, 21 სექტემბრიდან ხორბლის იმპორტისთვის წინასწარ იმპორტის ნებართვის მქონე პირებზე ახალი რეჟიმი გავრცელდება და ისინი თითოეულ ტონაზე 100 ლარის გადასახადს გადაიხდიან. ხოლო იმპორტიორები, რომლებმაც შეკვეთა ადრე გასცეს, პროდუქტს ქვეყანაში ძველი წესებით შემოიტანენ. აღსანიშნავია, რომ საქართველოში ფქვილის, ქერისა და ქატოს იმპორტზე გადასახადი მოქმედებს. ხორბლის ფქვილზე იმპორტის გადასახადი 2023 წლის 12 ივნისიდან, ხოლო ქატოსა და ქერზე „სარკისებრი გადასახადი“ 2023 წლის 10 ოქტომბრიდან ამოქმედდა.

www.24news.ge

ფერმერების მოთხოვნა გათვალისწინებულია — საქართველოში იმპორტირებულ ხორბალზე საბაჟო გადასახადი დაწესდება

სხვა სიახლეები