საქართველოში ახალგაზრდების რაოდენობა მცირდება, ხოლო ხანდაზმული მოსახლეობის რაოდენობა იზრდება — იზრდება საპენსიო და ჯანდაცვის ხარჯებიც

საქართველოში მოსახლეობის დაბერების პროცესი ჩქარდება. 24News.ge იუწყება, რომ ამის შესახებ აღნიშნულია ფინანსთა სამინისტროს მიერ 2027 წლის სახელმწიფო ბიუჯეტის პირველადი პროექტისთვის დამატებულ დოკუმენტში. სამინისტროს შეფასებით, მოსახლეობის დაბერება მომდევნო ათწლეულების განმავლობაში სერიოზულ ზეწოლას მოახდენს სახელმწიფო ბიუჯეტის ხარჯებზე. განსაკუთრებით, აღნიშნულია, რომ გაიზრდება მოთხოვნა ჯანდაცვის მომსახურებებსა და პენსიებზე გამოყოფილ თანხებზე. დოკუმენტის თანახმად, საქართველოში მოსახლეობის სწრაფი დაბერების ტენდენცია უკვე შეინიშნება. ამჟამად დაახლოებით 4 შრომისუნარიანი ადამიანის წილად 1 ხანდაზმული ადამიანი მოდის. გაეროს პროგნოზების მიხედვით, 2025 წელს 65 წლის და უფროსი ასაკის თითოეულ ადამიანზე დაახლოებით 4 შრომისუნარიანი ადამიანი მოდის. თუმცა, მოსალოდნელია, რომ ეს მაჩვენებელი 2075 წლისთვის 2,4 ადამიანამდე შემცირდება. ფინანსთა სამინისტროს გათვლებით, მომდევნო წლებში ხანდაზმული მოსახლეობის რაოდენობა სტაბილურად გაიზრდება. შრომისუნარიანი მოსახლეობის რაოდენობა კი გარკვეული პერიოდის განმავლობაში შედარებით სტაბილური დარჩება, თუმცა 2040-იანი წლებიდან შემცირებას დაიწყებს. დოკუმენტში ასევე აღნიშნულია, რომ მოსახლეობის დაბერება უკვე ქმნის ფისკალური ზეწოლის რისკს. სამინისტროს შეფასებით, ახალგაზრდებთან შედარებით, ხანდაზმული მოსახლეობა ქრონიკული დაავადებების უფრო მაღალი ტვირთის წინაშე დგას. მათ შორისაა ართრიტი, წელის ტკივილი, გულ-სისხლძარღვთა დაავადებები, დიაბეტი და ფსიქიკური ჯანმრთელობის პრობლემები. ხანდაზმული მოსახლეობა ასევე 2013 წელს დანერგილი უნივერსალური პირველადი ჯანდაცვის სისტემის ერთ-ერთი მთავარი მომხმარებელი ჯგუფია. ეს სისტემა მოიცავს უფასო ამბულატორიულ მომსახურებებსა და დიაგნოსტიკურ გამოკვლევებს. სამინისტრო აცხადებს, რომ დემოგრაფიული ცვლილებები ჯანდაცვის ხარჯების ზრდასაც გამოიწვევს. გათვლების მიხედვით, მხოლოდ დემოგრაფიული ცვლილებების გავლენის შედეგად, მომდევნო 50 წლის განმავლობაში ჯანდაცვის ხარჯების მშპ-სთან თანაფარდობა სხვადასხვა სცენარის მიხედვით საშუალოდ 0,2–0,6 პროცენტული პუნქტით შეიძლება გაიზარდოს. დოკუმენტში აღნიშნულია, რომ ზრდა ყველაზე მეტად შობადობის დაბალი დონის სცენარში შეინიშნება, თუმცა ჯანდაცვის ხარჯები შობადობის სამივე — დაბალი, საშუალო და მაღალი — სცენარში გაიზრდება. ფინანსთა სამინისტრო მოსახლეობის დაბერებას საქართველოსთვის მომდევნო წლებში მნიშვნელოვან დემოგრაფიულ და ფისკალურ გამოწვევად აფასებს. აღნიშნულია, რომ ხანდაზმული მოსახლეობის რაოდენობის ზრდასთან ერთად გაიზრდება როგორც საპენსიო, ისე ჯანდაცვის ხარჯებზე მოთხოვნა.

www.24news.ge

სხვა სიახლეები