მესტიისა და თელავის აეროპორტების ექსპლუატაციაში შესვლის თარიღი ცნობილია

მესტიისა და თელავის აეროპორტების ექსპლუატაციაში 2028 წელს შესვლა იგეგმება. 24News.ge იუწყება, რომ ამის შესახებ პრემიერ-მინისტრმა ირაკლი კობახიძემ მთავრობის სხდომაზე განაცხადა. პრემიერ მინისტრის განცხადებით, ორივე აეროპორტი ძირითადად შიდა ავიარეისებს მოემსახურება. პროექტების დასრულების შემდეგ, მესტიისა და თელავის აეროპორტებიდან თითოეული წელიწადში 50 ათას მგზავრს მოემსახურება. კობახიძემ განაცხადა, რომ 2025-2026 წლებში საქართველოს საავიაციო ბაზარს 10-ზე მეტი ახალი ავიაკომპანია და ახალი ავიამიმართულება დაემატა. მისი თქმით, გასულ წელს ქვეყნის სამმა საერთაშორისო აეროპორტმა ჯამში 8,5 მილიონ მგზავრს მოემსახურა, რაც წინა წელთან შედარებით 14 პროცენტიან ზრდას ნიშნავს. ფრენების რაოდენობა კი 16 პროცენტით გაიზარდა. პრემიერ მინისტრმა ასევე განაცხადა, რომ ქუთაისის საერთაშორისო აეროპორტში ახალი, 3,5 კილომეტრიანი ასაფრენ-დასაფრენი ბილიკი და სხვა აეროდრომის ინფრასტრუქტურა დაგეგმილზე ადრე შევა ექსპლუატაციაში. მისი თქმით, ამის შემდეგ აეროპორტი უფრო დიდი ზომის თვითმფრინავების მომსახურებასაც შეძლებს. კობახიძე ასევე შეეხო თბილისის საერთაშორისო აეროპორტთან დაკავშირებით კომპანია „TAV“-თან მიღწეულ შეთანხმებას. მან განაცხადა, რომ მოლაპარაკებების შედეგად დამატებით 150 მილიონი დოლარის ინვესტიცია იქნა მოზიდული და აეროპორტის მგზავრთა გამტარუნარიანობა ორჯერ გაიზრდება და 10 მილიონ მგზავრს მიაღწევს.

www.24news.ge

მესტიისა და თელავის აეროპორტების ექსპლუატაციაში შესვლის თარიღი ცნობილია

სხვა სიახლეები