Avropa Şurasının Baş katibi: "Gürcüstanda demokratik geriləmə dərin narahatlıq doğurur"

Avropa Şurasının Baş katibi Alen Berse Gürcüstanda müşahidə olunan demokratik geriləmənin ciddi narahatlıq yaratdığını bildirib. 24News.ge xəbər verir ki, Berse qeyd edib ki, ölkədə vətəndaş cəmiyyətinin fəaliyyət imkanlarının məhdudlaşdırılması, müxalifət və siyasi partiyalara təzyiqlər, həbslər, məhdudlaşdırıcı qanunvericilik təşəbbüsləri və polis zorakılığı hallarına görə hesabatlılığın olmaması qəbuledilməzdir. “İlk növbədə vurğulamaq istəyirəm ki, Gürcüstanla bağlı Avropa Şurasının fəaliyyətinə çox ciddi yanaşıram. Əvvəlki qətnamələrdə və bu həftə müzakirə olunan hesabatda əks olunan eyni reallığı görürük. Gürcüstanda demokratik geriləmə dərin narahatlıq doğurur və buna xüsusi diqqət yetirilməlidir”, – deyə o bildirib. Baş katib əlavə edib ki, ötən gün Gürcüstan vətəndaş cəmiyyətinin nümayəndələri ilə görüşüb və onların səsləndirdiyi narahatlıqlar mövcud vəziyyətin ciddiliyini bir daha təsdiqləyib. Bersenin sözlərinə görə, Gürcüstanın beynəlxalq platformalarda iştirak etməməsi vəziyyətin yaxşılaşmasına xidmət etmir və təcrid siyasəti çıxış yolu deyil: “Əsas məsələ konkret nəticələr əldə etməkdir. Məqsəd sadəcə düzgün addım atdığımızı söyləmək deyil, real və müsbət nəticələrə nail olmaqdır. Təcrid heç vaxt həll yolu olmayıb”, – deyə o vurğulayıb. Alen Berset bildirib ki, dialoq özlüyündə məqsəd deyil və əsas məsələ onun nə vaxt, necə və hansı nəticələrlə aparılmasıdır: “Bütün səviyyələrdə prosesdə iştirak etməyə davam edirəm. Mənim üçün təkcə dialoqun özü məqsəd ola bilməz. Əsas olan onun konkret nəticələr verməsidir. Bu mövqeyimi mayın 4-də İrəvanda Gürcüstanın Baş naziri İrakli Kobaxidze ilə görüşdə də açıq şəkildə ifadə etmişəm. Həmçinin komandama mövcud vəziyyətlə bağlı konkret həll yolları üzərində işləməyi tapşırmışam”, – deyə Avropa Şurasının Baş katibi qeyd edib.

www.24news.ge

Avropa Şurasının Baş katibi: "Gürcüstanda demokratik geriləmə dərin narahatlıq doğurur"

Digər xəbərlər