Marneulidə "Tasua" yürüşünə qatılan insanların təxmini sayı məlum olub (VİDEO)

Məhərrəm ayının 9-cu günü Marneulidə yerli sakinlərin, ətraf kəndlərdən və müxtəlif şəhərlərdən gələn inanclı insanların iştirakı ilə ənənəvi “Tasua” mərasimi keçirilib. 24News.ge beynəlxalq media qurumlarının kütləvi tədbirlərdə iştirakçı sayını müəyyənləşdirmək üçün istifadə etdiyi metodlardan yararlanaraq bu gün baş tutan “Tasua” yürüşündə iştirak edənlərin təxmini sayını hesablayıb. Aparılan hesablamalara əsasən, bu il Marneulidə keçirilən “Tasua” yürüşündə minimum 2 700, maksimum isə 3 600 nəfər iştirak edib. İstifadə olunan metod iştirakçıların toplandığı və ya hərəkət etdiyi ərazinin ölçülərinin müəyyənləşdirilməsinə əsaslanır. Hesablamaya görə, əldə olunan göstərici orta sıxlıq zamanı 3-ə, yüksək sıxlıq müşahidə edildikdə isə 4-ə vurulur. 24 iyun tarixində keçirilən yürüş zamanı karvanın ön hissəsi ilə son hissəsi arasındakı məsafə təxminən 900 metr olub. Bu göstərici əsasında aparılan hesablamaya görə, iştirakçıların sayı minimum 2 700, maksimum isə 3 600 nəfər arasında dəyişib. Müşahidələrə əsasən, builki mərasimdə əvvəlki illərlə müqayisədə kişi iştirakçıların sayı daha az olub. Qadın iştirakçıların sayının isə kişilərdən təxminən iki dəfə çox olduğu müşahidə edilib. Qeyd edək ki, kütləvi yürüş və aksiyalarda iştirakçıların sayını dəqiq müəyyənləşdirmək mümkün olmadığından, təqdim olunan rəqəmlər təxmini xarakter daşıyır və faktiki göstəricilərdən 15–20 faiz fərqlənə bilər.

www.24news.ge

Marneulidə "Tasua" yürüşünə qatılan insanların təxmini sayı məlum olub (VİDEO)

Digər xəbərlər